॥ एकविंशोऽध्यायः - २१ ॥ श्रीशुक उवाच इत्थं शरत्स्वच्छजलं पद्माकरसुगन्धिना । न्यविशद्वायुना वातं सगोगोपालकोऽच्युतः ॥ १॥ कुसुमितवनराजिशुष्मिभृङ्ग- द्विजकुलघुष्टसरःसरिन्महीध्रम् । मधुपतिरवगाह्य चारयन् गाः सह पशुपालबलश्चुकूज वेणुम् ॥ २॥ तद्व्रजस्त्रिय आश्रुत्य वेणुगीतं स्मरोदयम् । काश्चित्परोक्षं कृष्णस्य स्वसखीभ्योन्ववर्णयन् ॥ ३॥ तद्वर्णयितुमारब्धाः स्मरन्त्यः कृष्णचेष्टितम् । नाशकन् स्मरवेगेन विक्षिप्तमनसो नृप ॥ ४॥ बर्हापीडं नटवरवपुः कर्णयोः कर्णिकारं बिभ्रद्वासः कनककपिशं वैजयन्तीं च मालाम् । रन्ध्रान् वेणोरधरसुधया पूरयन् गोपवृन्दै- र्वृन्दारण्यं स्वपदरमणं प्राविशद्गीतकीर्तिः ॥ ५॥ इति वेणुरवं राजन् सर्वभूतमनोहरम् । श्रुत्वा व्रजस्त्रियः सर्वा वर्णयन्त्योऽभिरेभिरे ॥ ६॥ गोप्य ऊचुः अक्षण्वतां फलमिदं न परं विदामः सख्यः पशूननु विवेशयतोर्वयस्यैः । वक्त्रं व्रजेशसुतयोरनुवेणुजुष्टं यैर्वा निपीतमनुरक्तकटाक्षमोक्षम् ॥ ७॥ चूतप्रवालबर्हस्तबकोत्पलाब्ज- मालानुपृक्तपरिधानविचित्रवेषौ । मध्ये विरेजतुरलं पशुपालगोष्ठ्यां रङ्गे यथा नटवरौ क्व च गायमानौ ॥ ८॥ गोप्यः किमाचरदयं कुशलं स्म वेणु- र्दामोदराधरसुधामपि गोपिकानाम् । भुङ्क्ते स्वयं यदवशिष्टरसं ह्रदिन्यो हृष्यत्त्वचोऽश्रु मुमुचुस्तरवो यथाऽऽर्यः ॥ ९॥ वृन्दावनं सखि भुवो वितनोति कीर्तिं यद्देवकीसुतपदाम्बुजलब्धलक्ष्मि । गोविन्दवेणुमनु मत्तमयूरनृत्यं प्रेक्ष्याद्रिसान्वपरतान्यसमस्तसत्त्वम् ॥ १०॥ धन्याः स्म मूढगतयोऽपि हरिण्य एता या नन्दनन्दनमुपात्तविचित्रवेषम् । आकर्ण्य वेणुरणितं सहकृष्णसाराः पूजां दधुर्विरचितां प्रणयावलोकैः ॥ ११॥ कृष्णं निरीक्ष्य वनितोत्सवरूपशीलं श्रुत्वा च तत्क्वणितवेणुविचित्रगीतम् । देव्यो विमानगतयः स्मरनुन्नसारा भ्रश्यत्प्रसूनकबरा मुमुहुर्विनीव्यः ॥ १२॥ गावश्च कृष्णमुखनिर्गतवेणुगीत- पीयूषमुत्तभितकर्णपुटैः पिबन्त्यः । शावाः स्नुतस्तनपयःकवलाः स्म तस्थु- र्गोविन्दमात्मनि दृशाश्रुकलाः स्पृशन्त्यः ॥ १३॥ प्रायो बताम्ब विहगा मुनयो वनेऽस्मिन् कृष्णेक्षितं तदुदितं कलवेणुगीतम् । आरुह्य ये द्रुमभुजान् रुचिरप्रवालान् शृण्वन्त्यमीलितदृशो विगतान्यवाचः ॥ १४। नद्यस्तदा तदुपधार्य मुकुन्दगीत- मावर्तलक्षितमनोभवभग्नवेगाः । आलिङ्गनस्थगितमूर्मिभुजैर्मुरारेः गृह्णन्ति पादयुगलं कमलोपहाराः ॥ १५॥ दृष्ट्वाऽऽतपे व्रजपशून् सह रामगोपैः सञ्चारयन्तमनु वेणुमुदीरयन्तम् । प्रेमप्रवृद्ध उदितः कुसुमावलीभिः सख्युर्व्यधात्स्ववपुषाम्बुद आतपत्रम् ॥ १६॥ पूर्णाः पुलिन्द्य उरुगायपदाब्जराग- श्रीकुङ्कुमेन दयितास्तनमण्डितेन । तद्दर्शनस्मररुजस्तृणरूषितेन लिम्पन्त्य आननकुचेषु जहुस्तदाधिम् ॥ १७॥ हन्तायमद्रिरबला हरिदासवर्यो यद्रामकृष्णचरणस्पर्शप्रमोदः । मानं तनोति सह गोगणयोस्तयोर्यत् पानीयसूयवसकन्दरकन्दमूलैः ॥ १८॥ गा गोपकैरनुवनं नयतोरुदार- वेणुस्वनैः कलपदैस्तनुभृत्सु सख्यः । अस्पन्दनं गतिमतां पुलकस्तरूणां निर्योगपाशकृतलक्षणयोर्विचित्रम् ॥ १९॥ एवं विधा भगवतो या वृन्दावनचारिणः । वर्णयन्त्यो मिथो गोप्यः क्रीडास्तन्मयतां ययुः ॥ २०॥ इति श्रीमद्भागवते महापुराणे पारमहंस्यां संहितायां दशमस्कन्धे पूर्वार्धे वेणुगीतं नामैकविंशोऽध्यायः ॥ २१॥
॥ 𑌏𑌕𑌵𑌿𑌂𑌶𑍋𑌽𑌧𑍍𑌯𑌾𑌯𑌃 – ௨௧ ॥
𑌶𑍍𑌰𑍀𑌶𑍁𑌕 𑌉𑌵𑌾𑌚
𑌇𑌤𑍍𑌥𑌂 𑌶𑌰𑌤𑍍𑌸𑍍𑌵𑌚𑍍𑌛𑌜𑌲𑌂 𑌪𑌦𑍍𑌮𑌾𑌕𑌰𑌸𑍁𑌗𑌨𑍍𑌧𑌿𑌨𑌾 ।
𑌨𑍍𑌯𑌵𑌿𑌶𑌦𑍍𑌵𑌾𑌯𑍁𑌨𑌾 𑌵𑌾𑌤𑌂 𑌸𑌗𑍋𑌗𑍋𑌪𑌾𑌲𑌕𑍋𑌽𑌚𑍍𑌯𑍁𑌤𑌃 ॥ ௧॥
𑌕𑍁𑌸𑍁𑌮𑌿𑌤𑌵𑌨𑌰𑌾𑌜𑌿𑌶𑍁𑌷𑍍𑌮𑌿𑌭𑍃𑌙𑍍𑌗-
𑌦𑍍𑌵𑌿𑌜𑌕𑍁𑌲𑌘𑍁𑌷𑍍𑌟𑌸𑌰𑌃𑌸𑌰𑌿𑌨𑍍𑌮𑌹𑍀𑌧𑍍𑌰𑌮𑍍 ।
𑌮𑌧𑍁𑌪𑌤𑌿𑌰𑌵𑌗𑌾𑌹𑍍𑌯 𑌚𑌾𑌰𑌯𑌨𑍍 𑌗𑌾𑌃
𑌸𑌹 𑌪𑌶𑍁𑌪𑌾𑌲𑌬𑌲𑌶𑍍𑌚𑍁𑌕𑍂𑌜 𑌵𑍇𑌣𑍁𑌮𑍍 ॥ ௨॥
𑌤𑌦𑍍𑌵𑍍𑌰𑌜𑌸𑍍𑌤𑍍𑌰𑌿𑌯 𑌆𑌶𑍍𑌰𑍁𑌤𑍍𑌯 𑌵𑍇𑌣𑍁𑌗𑍀𑌤𑌂 𑌸𑍍𑌮𑌰𑍋𑌦𑌯𑌮𑍍 ।
𑌕𑌾𑌶𑍍𑌚𑌿𑌤𑍍𑌪𑌰𑍋𑌕𑍍𑌷𑌂 𑌕𑍃𑌷𑍍𑌣𑌸𑍍𑌯 𑌸𑍍𑌵𑌸𑌖𑍀𑌭𑍍𑌯𑍋𑌨𑍍𑌵𑌵𑌰𑍍𑌣𑌯𑌨𑍍 ॥ ௩॥
𑌤𑌦𑍍𑌵𑌰𑍍𑌣𑌯𑌿𑌤𑍁𑌮𑌾𑌰𑌬𑍍𑌧𑌾𑌃 𑌸𑍍𑌮𑌰𑌨𑍍𑌤𑍍𑌯𑌃 𑌕𑍃𑌷𑍍𑌣𑌚𑍇𑌷𑍍𑌟𑌿𑌤𑌮𑍍 ।
𑌨𑌾𑌶𑌕𑌨𑍍 𑌸𑍍𑌮𑌰𑌵𑍇𑌗𑍇𑌨 𑌵𑌿𑌕𑍍𑌷𑌿𑌪𑍍𑌤𑌮𑌨𑌸𑍋 𑌨𑍃𑌪 ॥ ௪॥
𑌬𑌰𑍍𑌹𑌾𑌪𑍀𑌡𑌂 𑌨𑌟𑌵𑌰𑌵𑌪𑍁𑌃 𑌕𑌰𑍍𑌣𑌯𑍋𑌃 𑌕𑌰𑍍𑌣𑌿𑌕𑌾𑌰𑌂
𑌬𑌿𑌭𑍍𑌰𑌦𑍍𑌵𑌾𑌸𑌃 𑌕𑌨𑌕𑌕𑌪𑌿𑌶𑌂 𑌵𑍈𑌜𑌯𑌨𑍍𑌤𑍀𑌂 𑌚 𑌮𑌾𑌲𑌾𑌮𑍍 ।
𑌰𑌨𑍍𑌧𑍍𑌰𑌾𑌨𑍍 𑌵𑍇𑌣𑍋𑌰𑌧𑌰𑌸𑍁𑌧𑌯𑌾 𑌪𑍂𑌰𑌯𑌨𑍍 𑌗𑍋𑌪𑌵𑍃𑌨𑍍𑌦𑍈-
𑌰𑍍𑌵𑍃𑌨𑍍𑌦𑌾𑌰𑌣𑍍𑌯𑌂 𑌸𑍍𑌵𑌪𑌦𑌰𑌮𑌣𑌂 𑌪𑍍𑌰𑌾𑌵𑌿𑌶𑌦𑍍𑌗𑍀𑌤𑌕𑍀𑌰𑍍𑌤𑌿𑌃 ॥ ௫॥
𑌇𑌤𑌿 𑌵𑍇𑌣𑍁𑌰𑌵𑌂 𑌰𑌾𑌜𑌨𑍍 𑌸𑌰𑍍𑌵𑌭𑍂𑌤𑌮𑌨𑍋𑌹𑌰𑌮𑍍 ।
𑌶𑍍𑌰𑍁𑌤𑍍𑌵𑌾 𑌵𑍍𑌰𑌜𑌸𑍍𑌤𑍍𑌰𑌿𑌯𑌃 𑌸𑌰𑍍𑌵𑌾 𑌵𑌰𑍍𑌣𑌯𑌨𑍍𑌤𑍍𑌯𑍋𑌽𑌭𑌿𑌰𑍇𑌭𑌿𑌰𑍇 ॥ ௬॥
𑌗𑍋𑌪𑍍𑌯 𑌊𑌚𑍁𑌃
𑌅𑌕𑍍𑌷𑌣𑍍𑌵𑌤𑌾𑌂 𑌫𑌲𑌮𑌿𑌦𑌂 𑌨 𑌪𑌰𑌂 𑌵𑌿𑌦𑌾𑌮𑌃
𑌸𑌖𑍍𑌯𑌃 𑌪𑌶𑍂𑌨𑌨𑍁 𑌵𑌿𑌵𑍇𑌶𑌯𑌤𑍋𑌰𑍍𑌵𑌯𑌸𑍍𑌯𑍈𑌃 ।
𑌵𑌕𑍍𑌤𑍍𑌰𑌂 𑌵𑍍𑌰𑌜𑍇𑌶𑌸𑍁𑌤𑌯𑍋𑌰𑌨𑍁𑌵𑍇𑌣𑍁𑌜𑍁𑌷𑍍𑌟𑌂
𑌯𑍈𑌰𑍍𑌵𑌾 𑌨𑌿𑌪𑍀𑌤𑌮𑌨𑍁𑌰𑌕𑍍𑌤𑌕𑌟𑌾𑌕𑍍𑌷𑌮𑍋𑌕𑍍𑌷𑌮𑍍 ॥ ௭॥
𑌚𑍂𑌤𑌪𑍍𑌰𑌵𑌾𑌲𑌬𑌰𑍍𑌹𑌸𑍍𑌤𑌬𑌕𑍋𑌤𑍍𑌪𑌲𑌾𑌬𑍍𑌜-
𑌮𑌾𑌲𑌾𑌨𑍁𑌪𑍃𑌕𑍍𑌤𑌪𑌰𑌿𑌧𑌾𑌨𑌵𑌿𑌚𑌿𑌤𑍍𑌰𑌵𑍇𑌷𑍗 ।
𑌮𑌧𑍍𑌯𑍇 𑌵𑌿𑌰𑍇𑌜𑌤𑍁𑌰𑌲𑌂 𑌪𑌶𑍁𑌪𑌾𑌲𑌗𑍋𑌷𑍍𑌠𑍍𑌯𑌾𑌂
𑌰𑌙𑍍𑌗𑍇 𑌯𑌥𑌾 𑌨𑌟𑌵𑌰𑍗 𑌕𑍍𑌵 𑌚 𑌗𑌾𑌯𑌮𑌾𑌨𑍗 ॥ ௮॥
𑌗𑍋𑌪𑍍𑌯𑌃 𑌕𑌿𑌮𑌾𑌚𑌰𑌦𑌯𑌂 𑌕𑍁𑌶𑌲𑌂 𑌸𑍍𑌮 𑌵𑍇𑌣𑍁-
𑌰𑍍𑌦𑌾𑌮𑍋𑌦𑌰𑌾𑌧𑌰𑌸𑍁𑌧𑌾𑌮𑌪𑌿 𑌗𑍋𑌪𑌿𑌕𑌾𑌨𑌾𑌮𑍍 ।
𑌭𑍁𑌙𑍍𑌕𑍍𑌤𑍇 𑌸𑍍𑌵𑌯𑌂 𑌯𑌦𑌵𑌶𑌿𑌷𑍍𑌟𑌰𑌸𑌂 𑌹𑍍𑌰𑌦𑌿𑌨𑍍𑌯𑍋
𑌹𑍃𑌷𑍍𑌯𑌤𑍍𑌤𑍍𑌵𑌚𑍋𑌽𑌶𑍍𑌰𑍁 𑌮𑍁𑌮𑍁𑌚𑍁𑌸𑍍𑌤𑌰𑌵𑍋 𑌯𑌥𑌾𑌽𑌽𑌰𑍍𑌯𑌃 ॥ ௯॥
𑌵𑍃𑌨𑍍𑌦𑌾𑌵𑌨𑌂 𑌸𑌖𑌿 𑌭𑍁𑌵𑍋 𑌵𑌿𑌤𑌨𑍋𑌤𑌿 𑌕𑍀𑌰𑍍𑌤𑌿𑌂
𑌯𑌦𑍍𑌦𑍇𑌵𑌕𑍀𑌸𑍁𑌤𑌪𑌦𑌾𑌮𑍍𑌬𑍁𑌜𑌲𑌬𑍍𑌧𑌲𑌕𑍍𑌷𑍍𑌮𑌿 ।
𑌗𑍋𑌵𑌿𑌨𑍍𑌦𑌵𑍇𑌣𑍁𑌮𑌨𑍁 𑌮𑌤𑍍𑌤𑌮𑌯𑍂𑌰𑌨𑍃𑌤𑍍𑌯𑌂
𑌪𑍍𑌰𑍇𑌕𑍍𑌷𑍍𑌯𑌾𑌦𑍍𑌰𑌿𑌸𑌾𑌨𑍍𑌵𑌪𑌰𑌤𑌾𑌨𑍍𑌯𑌸𑌮𑌸𑍍𑌤𑌸𑌤𑍍𑌤𑍍𑌵𑌮𑍍 ॥ ௧௦॥
𑌧𑌨𑍍𑌯𑌾𑌃 𑌸𑍍𑌮 𑌮𑍂𑌢𑌗𑌤𑌯𑍋𑌽𑌪𑌿 𑌹𑌰𑌿𑌣𑍍𑌯 𑌏𑌤𑌾
𑌯𑌾 𑌨𑌨𑍍𑌦𑌨𑌨𑍍𑌦𑌨𑌮𑍁𑌪𑌾𑌤𑍍𑌤𑌵𑌿𑌚𑌿𑌤𑍍𑌰𑌵𑍇𑌷𑌮𑍍 ।
𑌆𑌕𑌰𑍍𑌣𑍍𑌯 𑌵𑍇𑌣𑍁𑌰𑌣𑌿𑌤𑌂 𑌸𑌹𑌕𑍃𑌷𑍍𑌣𑌸𑌾𑌰𑌾𑌃
𑌪𑍂𑌜𑌾𑌂 𑌦𑌧𑍁𑌰𑍍𑌵𑌿𑌰𑌚𑌿𑌤𑌾𑌂 𑌪𑍍𑌰𑌣𑌯𑌾𑌵𑌲𑍋𑌕𑍈𑌃 ॥ ௧௧॥
𑌕𑍃𑌷𑍍𑌣𑌂 𑌨𑌿𑌰𑍀𑌕𑍍𑌷𑍍𑌯 𑌵𑌨𑌿𑌤𑍋𑌤𑍍𑌸𑌵𑌰𑍂𑌪𑌶𑍀𑌲𑌂
𑌶𑍍𑌰𑍁𑌤𑍍𑌵𑌾 𑌚 𑌤𑌤𑍍𑌕𑍍𑌵𑌣𑌿𑌤𑌵𑍇𑌣𑍁𑌵𑌿𑌚𑌿𑌤𑍍𑌰𑌗𑍀𑌤𑌮𑍍 ।
𑌦𑍇𑌵𑍍𑌯𑍋 𑌵𑌿𑌮𑌾𑌨𑌗𑌤𑌯𑌃 𑌸𑍍𑌮𑌰𑌨𑍁𑌨𑍍𑌨𑌸𑌾𑌰𑌾
𑌭𑍍𑌰𑌶𑍍𑌯𑌤𑍍𑌪𑍍𑌰𑌸𑍂𑌨𑌕𑌬𑌰𑌾 𑌮𑍁𑌮𑍁𑌹𑍁𑌰𑍍𑌵𑌿𑌨𑍀𑌵𑍍𑌯𑌃 ॥ ௧௨॥
𑌗𑌾𑌵𑌶𑍍𑌚 𑌕𑍃𑌷𑍍𑌣𑌮𑍁𑌖𑌨𑌿𑌰𑍍𑌗𑌤𑌵𑍇𑌣𑍁𑌗𑍀𑌤-
𑌪𑍀𑌯𑍂𑌷𑌮𑍁𑌤𑍍𑌤𑌭𑌿𑌤𑌕𑌰𑍍𑌣𑌪𑍁𑌟𑍈𑌃 𑌪𑌿𑌬𑌨𑍍𑌤𑍍𑌯𑌃 ।
𑌶𑌾𑌵𑌾𑌃 𑌸𑍍𑌨𑍁𑌤𑌸𑍍𑌤𑌨𑌪𑌯𑌃𑌕𑌵𑌲𑌾𑌃 𑌸𑍍𑌮 𑌤𑌸𑍍𑌥𑍁-
𑌰𑍍𑌗𑍋𑌵𑌿𑌨𑍍𑌦𑌮𑌾𑌤𑍍𑌮𑌨𑌿 𑌦𑍃𑌶𑌾𑌶𑍍𑌰𑍁𑌕𑌲𑌾𑌃 𑌸𑍍𑌪𑍃𑌶𑌨𑍍𑌤𑍍𑌯𑌃 ॥ ௧௩॥
𑌪𑍍𑌰𑌾𑌯𑍋 𑌬𑌤𑌾𑌮𑍍𑌬 𑌵𑌿𑌹𑌗𑌾 𑌮𑍁𑌨𑌯𑍋 𑌵𑌨𑍇𑌽𑌸𑍍𑌮𑌿𑌨𑍍
𑌕𑍃𑌷𑍍𑌣𑍇𑌕𑍍𑌷𑌿𑌤𑌂 𑌤𑌦𑍁𑌦𑌿𑌤𑌂 𑌕𑌲𑌵𑍇𑌣𑍁𑌗𑍀𑌤𑌮𑍍 ।
𑌆𑌰𑍁𑌹𑍍𑌯 𑌯𑍇 𑌦𑍍𑌰𑍁𑌮𑌭𑍁𑌜𑌾𑌨𑍍 𑌰𑍁𑌚𑌿𑌰𑌪𑍍𑌰𑌵𑌾𑌲𑌾𑌨𑍍
𑌶𑍃𑌣𑍍𑌵𑌨𑍍𑌤𑍍𑌯𑌮𑍀𑌲𑌿𑌤𑌦𑍃𑌶𑍋 𑌵𑌿𑌗𑌤𑌾𑌨𑍍𑌯𑌵𑌾𑌚𑌃 ॥ ௧௪।
𑌨𑌦𑍍𑌯𑌸𑍍𑌤𑌦𑌾 𑌤𑌦𑍁𑌪𑌧𑌾𑌰𑍍𑌯 𑌮𑍁𑌕𑍁𑌨𑍍𑌦𑌗𑍀𑌤-
𑌮𑌾𑌵𑌰𑍍𑌤𑌲𑌕𑍍𑌷𑌿𑌤𑌮𑌨𑍋𑌭𑌵𑌭𑌗𑍍𑌨𑌵𑍇𑌗𑌾𑌃 ।
𑌆𑌲𑌿𑌙𑍍𑌗𑌨𑌸𑍍𑌥𑌗𑌿𑌤𑌮𑍂𑌰𑍍𑌮𑌿𑌭𑍁𑌜𑍈𑌰𑍍𑌮𑍁𑌰𑌾𑌰𑍇𑌃
𑌗𑍃𑌹𑍍𑌣𑌨𑍍𑌤𑌿 𑌪𑌾𑌦𑌯𑍁𑌗𑌲𑌂 𑌕𑌮𑌲𑍋𑌪𑌹𑌾𑌰𑌾𑌃 ॥ ௧௫॥
𑌦𑍃𑌷𑍍𑌟𑍍𑌵𑌾𑌽𑌽𑌤𑌪𑍇 𑌵𑍍𑌰𑌜𑌪𑌶𑍂𑌨𑍍 𑌸𑌹 𑌰𑌾𑌮𑌗𑍋𑌪𑍈𑌃
𑌸𑌞𑍍𑌚𑌾𑌰𑌯𑌨𑍍𑌤𑌮𑌨𑍁 𑌵𑍇𑌣𑍁𑌮𑍁𑌦𑍀𑌰𑌯𑌨𑍍𑌤𑌮𑍍 ।
𑌪𑍍𑌰𑍇𑌮𑌪𑍍𑌰𑌵𑍃𑌦𑍍𑌧 𑌉𑌦𑌿𑌤𑌃 𑌕𑍁𑌸𑍁𑌮𑌾𑌵𑌲𑍀𑌭𑌿𑌃
𑌸𑌖𑍍𑌯𑍁𑌰𑍍𑌵𑍍𑌯𑌧𑌾𑌤𑍍𑌸𑍍𑌵𑌵𑌪𑍁𑌷𑌾𑌮𑍍𑌬𑍁𑌦 𑌆𑌤𑌪𑌤𑍍𑌰𑌮𑍍 ॥ ௧௬॥
𑌪𑍂𑌰𑍍𑌣𑌾𑌃 𑌪𑍁𑌲𑌿𑌨𑍍𑌦𑍍𑌯 𑌉𑌰𑍁𑌗𑌾𑌯𑌪𑌦𑌾𑌬𑍍𑌜𑌰𑌾𑌗-
𑌶𑍍𑌰𑍀𑌕𑍁𑌙𑍍𑌕𑍁𑌮𑍇𑌨 𑌦𑌯𑌿𑌤𑌾𑌸𑍍𑌤𑌨𑌮𑌣𑍍𑌡𑌿𑌤𑍇𑌨 ।
𑌤𑌦𑍍𑌦𑌰𑍍𑌶𑌨𑌸𑍍𑌮𑌰𑌰𑍁𑌜𑌸𑍍𑌤𑍃𑌣𑌰𑍂𑌷𑌿𑌤𑍇𑌨
𑌲𑌿𑌮𑍍𑌪𑌨𑍍𑌤𑍍𑌯 𑌆𑌨𑌨𑌕𑍁𑌚𑍇𑌷𑍁 𑌜𑌹𑍁𑌸𑍍𑌤𑌦𑌾𑌧𑌿𑌮𑍍 ॥ ௧௭॥
𑌹𑌨𑍍𑌤𑌾𑌯𑌮𑌦𑍍𑌰𑌿𑌰𑌬𑌲𑌾 𑌹𑌰𑌿𑌦𑌾𑌸𑌵𑌰𑍍𑌯𑍋
𑌯𑌦𑍍𑌰𑌾𑌮𑌕𑍃𑌷𑍍𑌣𑌚𑌰𑌣𑌸𑍍𑌪𑌰𑍍𑌶𑌪𑍍𑌰𑌮𑍋𑌦𑌃 ।
𑌮𑌾𑌨𑌂 𑌤𑌨𑍋𑌤𑌿 𑌸𑌹 𑌗𑍋𑌗𑌣𑌯𑍋𑌸𑍍𑌤𑌯𑍋𑌰𑍍𑌯𑌤𑍍
𑌪𑌾𑌨𑍀𑌯𑌸𑍂𑌯𑌵𑌸𑌕𑌨𑍍𑌦𑌰𑌕𑌨𑍍𑌦𑌮𑍂𑌲𑍈𑌃 ॥ ௧௮॥
𑌗𑌾 𑌗𑍋𑌪𑌕𑍈𑌰𑌨𑍁𑌵𑌨𑌂 𑌨𑌯𑌤𑍋𑌰𑍁𑌦𑌾𑌰-
𑌵𑍇𑌣𑍁𑌸𑍍𑌵𑌨𑍈𑌃 𑌕𑌲𑌪𑌦𑍈𑌸𑍍𑌤𑌨𑍁𑌭𑍃𑌤𑍍𑌸𑍁 𑌸𑌖𑍍𑌯𑌃 ।
𑌅𑌸𑍍𑌪𑌨𑍍𑌦𑌨𑌂 𑌗𑌤𑌿𑌮𑌤𑌾𑌂 𑌪𑍁𑌲𑌕𑌸𑍍𑌤𑌰𑍂𑌣𑌾𑌂
𑌨𑌿𑌰𑍍𑌯𑍋𑌗𑌪𑌾𑌶𑌕𑍃𑌤𑌲𑌕𑍍𑌷𑌣𑌯𑍋𑌰𑍍𑌵𑌿𑌚𑌿𑌤𑍍𑌰𑌮𑍍 ॥ ௧௯॥
𑌏𑌵𑌂 𑌵𑌿𑌧𑌾 𑌭𑌗𑌵𑌤𑍋 𑌯𑌾 𑌵𑍃𑌨𑍍𑌦𑌾𑌵𑌨𑌚𑌾𑌰𑌿𑌣𑌃 ।
𑌵𑌰𑍍𑌣𑌯𑌨𑍍𑌤𑍍𑌯𑍋 𑌮𑌿𑌥𑍋 𑌗𑍋𑌪𑍍𑌯𑌃 𑌕𑍍𑌰𑍀𑌡𑌾𑌸𑍍𑌤𑌨𑍍𑌮𑌯𑌤𑌾𑌂 𑌯𑌯𑍁𑌃 ॥ ௨௦॥
𑌇𑌤𑌿 𑌶𑍍𑌰𑍀𑌮𑌦𑍍𑌭𑌾𑌗𑌵𑌤𑍇 𑌮𑌹𑌾𑌪𑍁𑌰𑌾𑌣𑍇 𑌪𑌾𑌰𑌮𑌹𑌂𑌸𑍍𑌯𑌾𑌂 𑌸𑌂𑌹𑌿𑌤𑌾𑌯𑌾𑌂
𑌦𑌶𑌮𑌸𑍍𑌕𑌨𑍍𑌧𑍇 𑌪𑍂𑌰𑍍𑌵𑌾𑌰𑍍𑌧𑍇 𑌵𑍇𑌣𑍁𑌗𑍀𑌤𑌂 𑌨𑌾𑌮𑍈𑌕𑌵𑌿𑌂𑌶𑍋𑌽𑌧𑍍𑌯𑌾𑌯𑌃 ॥ ௨௧॥
Pingback: Grantha Reading Practice